Menu Close

02. ප්‍රාග් ඓතිහාසික ගල් මෙවළම්

මේ තියෙන්නේ ප්‍රාග් ඓතිහාසික ගල් මෙවළමක්.‍ සෙන්ටිමීටර් 3ක් විතර ඇති. ‘බලංගොඩ උල් මෙවළම්’ (Balangoda Point) කියල කියන්නේ මෙවට. ජ්‍යාමිතික නොවන හැඩයක් තියෙන ‘ක්ෂුද්‍ර ශිලා’ නැතිනම් ඉතා කුඩා ගල් මෙවළමක් මේක. උල් ආයුධයක් වගේ තමා පේන්නේ. පිරිසිදු ගිනිගල් / තිරුවාණාවලින් සකස් කරල තියෙන මේ මෙවළ‍මේ හැම පැත්තෙම පතුරු ඉවත් කරල තමා හදල තියෙන්නේ. ගල් ආයුධ ගැන කතාකරද්දි ඒකට කියනා ‘බහු පතුරු ඉවත් කිරීම’ (poly facial) කියල.

මේ ගල් ආයුධ වර්ගය බුන්දල, බටදොඹලෙන වගේ තැන්වලිනුත් මහාචාර්ය රාජ් සෝමදෙව මැතිතුමාට උඩවලවේ නිම්ණයේ කළ පුරාවිද්‍යා කැනීම්වලිනුත් ලැබිල තියෙනවා. ලංකාවෙන්ම බැලුවොත් මේ වගේ ඒවා 7-8ක් විතර තමා හමුවෙලා තියෙන්නේ. මේ වගේ ඒවා ලංකාවෙන් හැර ලෝකයේ වෙනත් තැන්වලින් තාම හමුවෙලා නෑ. හැබැයි මේ හා තරමක් සමාන ගල් ආයුධ කීපයක් ඉන්දියාවේ ‘තෙරි සයිට්’ කියන පුරාවිද්‍යා සන්දර්බවලින් හමුවෙලා තියෙනවා කියලත් කියනවා.

මේ ගල් මෙවළම ගැන කතාකරන ඒ පිළිබඳ ලෝක පරිමාණයේ විද්වතෙක් වන සිරාන් දැරණියගල ආචාර්යතුමා කියල තියෙන්නේ මේ නායකත්වය පිළිඹිබු කරන සංඛේතයක්, වන්දනා කිරීම සඳහා භාවිත කළ (සමාජ මානව විද්‍යාවේ දි තොටම් කියල කියන්නේ) දෙයක් විය හැකියි කියල. ඒ හැර වෙනත් භාවිතයකට ගත්ත කියල හිතන්න අමාරුයි.

ආචාර්ය එච්. නිමල් පෙරේරා මැතිතුමාගේ Prehistoric Sri Lanka කියන පොතේ පිටකවරයෙන් තමා මේ රූපේ උපුටල ගත්තේ. සාධක නැති, ආත්මවාදි රාවනා කෙනෙක් පස්සේ කොර ගගහ යනවට වඩා ලෝකය ඉදිරියේ අපිට ආඩම්බර වෙන්න තියෙන දහස් ගණන් දේ අතුරින් මේ තවත් එකක් විතරයි කියලත් කියන්න කැමතියි. (මේක මහ රැවුලාගේ අහවල් එක කියල නම් කියන්න හදන්න එපා ඕන්න.)

%d bloggers like this: